Leitungmiten i umna gam zil leh i minam tuom dungzui in i hindan leh gamtat dan kibang kimlou hi. Gam khat mite adia umdan hoi chi khat khu mundang ah bawl ngailou sil khat ahi thei hi. Bangteng hilezong kitan thei chiet umdan hoi tamtah a um veve hi. Tuabang khenkhatte tomkim in gen vai.
1. Ann nehkhawmna ah
Nang sang a lienzaw leh upazawte toh ann nekhawm ding nahileh a ne masa in pang sinlen, dawkang (table) ah annehna a nazahlou na khut pen ngam sin. Kham masa a dinkhiet pai na utleh kamsiemtah in ‘Kei na masa vang e’ chin awl in dingkhie in.
2. Anne dia kichielna ah
Anne dia chiel mawng hilou hinanleh mi inn a na kholaivahna a anne dia ang kichiel ahisihleh ang kisawlleh mawh neh lou ding ahi. Ahivang in ang chielten ang chiel masang a annkuong ang lui masah vawt uleh vang neh ding ma ahi. tuabang ma in en zong kamsiem dan a “Ann hing ne aw” chia mi hing vahte mawh sawllou a, “Hing tou aw” chia na houpi masah sil hoi ahi.
3. Inn a mi ang haw chiengleh
Inn a mi ang kholaivahleh kimupi pai inlen, touna pienlen, hoitah in houpi in; tuisieng ahilouleh niengtui (singpi) na piehthawleh ahoi a, a pei ding chieng in kelkot tan beh vaha in.
4. Zintun-paikhai thu ah
Zin-le-leng hau inneitu khu mi hampha ahia, a zinte vaitun siem khu mi hoi ahi. Na zinte mizie theichien inlen, tuabang ma in a zen dan zong siem in.
5. Zatou-inn a damlou ve chieng in
Shi nua chieng a kigalna puon mantampipi kipieh sang in,
damloulai innlum ahisihleh Zatou-inn a kive nahpitah in
phatuom in hoizaw hi. Tuazieh in damlou vena ding hun
ahisihleh sum neising chivawtsin kisia vateh. Zatou-inn a
damlou ve chieng a gamlum vawtlou ding ahi.
6. Kholai a mi toh na zawh chieng in
Mi toh kholai a vahkhawm nahileh, na kizawhpipen hil vatehlou in midang toh sawtpi houlim tadi sin. Tuabang ma in nang zong mi lampeilai na houpi nuomleh kilehei in ama lampei subuoilou din zui kawm in vahoupi thei dan kizil in.
7. Mishi uopna ah
Mishi suun a hisihleh gal a haw hinapi a, shivui vaiguon kizahlai a, a ningkhat a thudang gen a husa neikhop a umlou ham sawm ding ahi. Vaiguon teng zawsieng tan uop ding ahi.
8. Moulop chiengleh
Theina kibelap zel in mun tamzawte ah kizang nawnsih lezong, mun khenkhat ah kiteen nitah chieng a zanha chinlou a hoi hi. Tualeh mun khenkhat ah moulieten zong zan ni zan thum a lawm tegel uh a giehpi nalai mawh uhi. Tampen a mawl huoi sil a kingai khat ahi.
9. Kihakang ding chieng leh
Kihakang chipen zunsuoh ehsuoh hun china ahi. Khopi a umten ahithei tan a tuabang mun dia kibawlte ah va kihakang ding ahi. Tambang mun umlouna ah zong kihakang nang in mun kizen deu sui ding ahi. Heisung a umte hileizong tambang hun in ang phahkhah chiengleh va daileng tavang e chia hem gen dan kizil ahoi hi.
10. Melmutongsan zahdan
Tung Pasian vangbuohna zal a na inn a Melmutongsan (TV) na et thei kipahhuoi a, hinanlezong na inn a hing kholaivahte thudon louna zen a man khah ding kiven ahoi hi. Et utte suina (remote control) pen naupangte thuneina a koi khu sil kizenlou khat ahia, tuabangma in eima lunglutna et gige sawm zong lenglate heumangna dia vanzah hoipen khat ahi.
