Siemjilna leh khutsiem-silbawlna lam a khantou na te'n Zogam hing jel tou in, igam a sang-inn hing tam hiei2 ahiman in Sangshie ding Manipur Government leh BSEM nuoi ah kei jong ka Degree leh TET certificate toh Sangshie khat hi sam ding in lawchinna kum 2007 in ka nga hi. Manipur govt. sai na nuoi ahi jieh ma ahi ding a, kum 2 (ni) sung mawng2 a kivei nua in Sangshie tah2 ding in 2009 in Zodawn Vangkhuo, Singngat Sub-division, ah akhanglai deu chi'n a'ng ki posting hi. Ngap-le-ngap lou thu a kinga di hile vang a ngap in kapum ngap maw key hi. Hinanleh kaneu lai apat a kapuoh nat ma2, Zoutate siemjilna a kei jong panmun nei thei ding a um ka himan in kalungsim khat ah kipahna khat ka nei tei sam hi. Kisah kholna leh tambang lunggel tuom2 te kanei lai in January ni 25, 2010 in ka kuon khe ta hi. Behieng Tata a tou suh in kei ngen kahi toh ka lungbang a leng ngut2 sam a, Singngat taang khen suh in Likhai lui kan khie a lam tou ka kal lai tah un kapien na khuo Muollum nop dan ka thei chien pan hi. Hinanleh, mi Delhi, Mumbai genlo, foreign a bawn peita ua ka chi leh kei le kei ka ki ha muon thei sam hi. Buolkot kagei tou un sepai te'n check ang na bawl ua, Nupi khat ju apuoh a mat pieh uhi. Pasal kahi jieh jong hive ve sam leh gari kham mi kahi man a a tung a tou ka hi tuon sih a, lamkim a kal kahi jieh in a maibuh (front sit) ah tou ut ma2 nanleng, a tung a tou kahi man in a sunga tou te kamu lo 1 le 2 ka mu be hi. Juntha a ka pawt kal in nupi nu da mel po kawm a gari a kal tou kamu a, kei jong gari pei sawm ahi man in ka kal tou kia ta hi. Ka lam jawt uh sun jom tou jel in sawt lou nua in Hiengtam(K) ka tung tou ua, ka pei na ding khuo jot na lampika gei ka phah ma sang deu un gari angki nga a tuanah kei jong mi 7 vel toh ka kum ta uhi. Katang a pei ding lah kahi ngal a chi'n pam a Niengtui Hotel ah niengtui leh tanghou ka va ne sam hi. Hotel nei nu'n meltha chi dan amah ang maingal khol sih a, ken jong Zodawn tan nai bang jat lamjawt na e? Chia ka doh leh "Nai 5(nga)" chi'n ang dawng tan hiau hi. Ka nai ka et leh nai 10 pel hiau pan in. Kavante la in Zodawn Vangkhuo juon in phalbi nisa nuoi ah ka lam jawt ka pan pai hi. Hiengtam khuo Hanmuol ka khen tou in ka tui puoh tam lou dawn in ka naw len ta hi. Nai 1(khat) ding phiel lam kajawt nua in kamai a thawm gin kaja a, kei jong mi pei e chin ka del pai a, sawt lou nua in Papi kum 50 guol khat pei kamu a, nuaphah in ka pei khawm gel uhi. Ang houpi pai sih a, kei jong kipan in, "Hei a pei di ne Pa?" ka chileh "Zodawn ala" ang chi guap a."Tami lampi Zodawn jot na lampi hijuh a" ang chisan nalai hi. Sawt simtah ham lou a kapei nua un "Nang Zodawn a bang bawl di nei ne?" ang chi a, kei jong kamsiem thei dan2 in"Zodawn a Sangshie ding a hing pei hi'ng e. Sangnaupang bang jat a um jou diei?" chia dong kawm in ka dawng a, "25 beh um va" chi'n ang dawng hi. "Sangshie koi ma ka khuo ua um den um lou ua kai le kailou kibang hi" ang chi be hi. Ken jong "Kei amasa pen di kavele maw?" chi'n nui kawm ka doh leh lamdang sa sim pien tah in"Hei a pansia di la?" ang chi a, "Hausate in ah tung phot vang in awl in mundang alem thei dan2 jil in ki um ta ven" ka chi hi. "Kang bang chi hat diei?" chia ka doh leh "Pa Mang hing chile chin" achia, "Phiemphu te nama?" ka chileh "Zodawn a phiemphu um sun2 hing e." ang chi a, "Phiemphu te kahi lam na bang chi thei la Pa Mang?" ka chi pai leh " Namin Thanglalbieh hima lou i? Kakhuo ua Sangshie ding te athei lo in um sam va nang chi e?" ang chileh kalung anop sah jou key sam hi. Kei ngai dan a pen koi man bang ma athei khah lou ding dan a ka ngai tuo leh ana hi sam lo dan ahi.
Zodawn khuo katung khong2 ua, gim tah in Hausate in chia Pa Mang gen pen ah ka lut phei pai a, Nupi kum 40 ding lah khat ana um a, "Sangshie ding a hingpei hi tang e." chi toh lut kathuo leh ang na chibai pai a, "Bawinu, dawnding tui hing tawi ou" chi'n ann-huon buh lang a um atanu a sawl pai sam hi. Kei jong kavan koi khie a ka tou leh, Nungah mel hoitah Singtanghoi ma2, duongching khat in kadawn ding tui ang tawi phei a, mit phe lou phiel in kana en hi. Naikal 5 kalam jawt gimna teng bang bei jou phiel in ka thei hi. "Tui dawn aw Lal" ang chileh "Bang 'lal' la? U lal hing chive" chi ding bang ka lung sim ah a um a, chilah chisam lou in ka tuidawn na nou ka pe kia hi. Sawt lo ka tou nua in Hausapi ka gei ah ang tou a, " Lamnu akhu, ka tanu tahpen, tui ing sawh pen" a chia," Lamnu.. Lamnu.. Chia ka lungsim a tepte ding kasawm lai tah in, "Ha tha a moutha ding ata khu, Hiengtam Hausapu tapa tumpe'n, i nua kum a Bank PO mupa toh ni 19 chia Dansiengthou a ki nei di ahi ukhu." ang chi leh a gim tha kia in kaki thei phiel hi. Kei jong sip deelduul in ki um leh da chiah tempawng toh ki del khiet thei na vai khat hi e chi'n, "Aw.. A hoive le." ka chi tei sam hi... Aban Sutjom ding... Simtu a um jen2 leh na comment uh dungjui in sunjom va ui. A story kipan2 ahi.
"Aaam..." ka chi leh, " Nu Nieng hing chi in" a chia, ken jong, "Ka nehthei puoh jong lui gawp tave e Nu Nieng" chin, ka bag sunga pat ka nu hing bawl sah tanghou leh jubi ki hal ka pe sam hi. Ba khat nua in, ki sil ding a kaki sah Nu Nieng in ang mu in, "Lamnu, Lalpu tuivai lui ah tui po kawm ding in va thah aw.." a chia, kei ma ki et dan in lah ka upat tuoh jo ngal a, bang ding a "Lal/Lalpu" chia hng ki naupang hat ahia chi toh akum doh tei sawm in Tuivai lui ah kisil ding in kapei suh nam2 a, sawt lo ka pei nua un ken jong(ki upa sah deu in) "Lam, kum bang jat nahi tai?" ka chi leh, "25, Nang la?" ang chi zat a, "a chileh kum 1 a naupang jo navele m?" chi'n ka van dah sam a, "Nou aki ngai umo Lam?" ka chi leh, ki suong la sim kawm in "December a ang haw ua ka mu pan hi, ama mun dang a aneu apat um den akhu" achia, "Amin bang e?" ka chileh, "Steve" akhu a chia, nui sim kawm in, "Na Nu Nieng in Steep2 chia ahat vagiap" chi toh anui be hi. Na Nu Nieng ang chi leh amau inn sung mi hi na khat nei bang hiel in kaki ngai jou sam hi. "Ei mi min nei lo i?" ka chi gem gam leh, "Lalhaulien a khu, apa te'n a sap min ngen a ahat uh a hi chia.." a chia, " U Steve na chi ngai ven m?" chia ka chiem nui phei leh, Ka lieng a beng phei a,lieng beh hi bang nop ahi lam ka thei pan hi. Ang beh kia khah leh chia ka nai bawl sim leh nui kawm in," Lung kham teh U Lal, U ka chi lel sih dia" ang chi a, kei lah 'U Lal' ang chi mai2 a jong heartfail phiel a me jem jom ka na hi khin khian hi. Lamnu'n Tuivai ka tun2 un tui a dim pai a, "kang ngah diei ma?" ang chi a, "Ngai sih ei, na nu'n hing ngah la va, ana pei pai to" ka chileh atui pat ding in ang ngen a, ja man lou phiel a ka dieng phei leh ka towel aki phel law dihtah giap hi. Mai sam pem pom a ka nua koi leh, "Bang jum la?" ang chi a, ki pa sah deu in "jum ta lo jen ing" chitoh a tui ka pat a, bel lien pi hinanleh a jaang dan alam dang hi. Lamnu pei jo2 in lui ah kaki dieng suh pai a, kalung sim teng Lamnu'n a luo dim hi. February ni 19 chia a pasal ding ang hing jot san ding bang ka gel leh, kum khat mai2 ana um bai deu hiau hileng chi ka lung gul ngud2 hi. Kisil jo a pei tou in, kei le kei maw ki sah na in ka pum dim hi. Bang ding a numei hi jat lai a, khau khi sa khat va lung gul kawi ngia ngua chin ka ki hepi sam sih hi. Ka tung tou in phal bi lai chi ma, ana miel phiel ta a, Nu Nieng in Ah-buh gei a ding in, "I khanglui tawn pi u jieh a tutan me huon lo a ki um akhu, na gil jong kiel gawp tava mo Lal?" ang chi a, khang lui te'n Ah ame chieng a amiel mat jel ua, a jaan huon jel uh ahi chi pen atah a kamu pat ahi jieh in ba khat ham lou a en in, "Kiel nai mawh lo e" ka chi hi.
Van te koi tup in, In sung ka lut a, puon heng khie in, annhuon buh ka lud phei leh, Lamnu'n tuilum Ah mul baw na ding hile kilawm in ana suong sou hi. Kei jong mei nai phei in kaki hang pai leh, in mai apat in " Bawinu hing pei juai ou" chi'n Nu Nieng ang ki kou a, Lamnu jong tai pawt pai in, ba khat nua in Ahtal melpha pi khat akhut a jau sim pum2 a tawi in ang lud hi. Ken jong nui sat toh thuo in, "Ah jau nave m?" chi'n ka lah pieh a, Inn sia lang a tempawng toh tawi pawt in a ngong ka va tan sah pai hi. Ka lud kia leh tui sa kuong a ki lui jou ana um a, phuum suh pai a amul ka baw sawm leh, " U Lal, ken hing bawl vang" chi'n Lamnu'n ang lah pieh hi. "Na Nu la?" chia ka doh leh, "Upa Khampu buoi sie kapa toh ava del u hi.." chi'n lungkim chet lo bang in a gen a, Hing nui khe sim pien in, "Ka Nu ngen in a bawl jel hia" chi in siem khol lo pi in Ahmul a bot jom hi. A baw jo in, kei jong "ana tou khin khian o" chi'n ka em pai a, asa ka ten pai leh, Lamnu in hoi tah a hing en kiu kiau ahi chi ka thei a, ka et phei pai leh aki thei maw bawl hi. Ka sat jaw in huon pai in mei awi in ka tou a, Lamnu'n anua thaang teng a hep jaw in ang tou sam hi. Sawt sim pi khat ham lou a ka um nua un, " Nop maw na sa e?" chi'n ang dong a, "Ni khat ki um nai lo a anop le nop lo thu gen pai d ha sa e" ka chi leh, "Nasep hun hing ki pan leh chim khop na ve chin" ang chi a, "Naupangte beh um sam na lo d?" chia ka nuileh ama jong ang nui sam a, A nui leh hoi ka sah na apung deu2 nalai hi. Da chieng a gen lo d teng genkha d hing e chi kei le kei ka ki jau pi man in lup na lang a bangma bawl ding um lo hinanleh ka peisan ta hi.
Lup na lang a baa khat ka um kal in, Lamnu nu le pa a'ng tung kia ua, Lamnu'n ann neh thei ding in ana koi man hiau a, ne ding a kapei phei leh Nu Nieng in, "Lal, na Pa Lien lai na an neh jaw chieng in va et pi juai ve maw?" ang chi a, inn lam hileh chu "Tunitah ka gimtoh jingmawng chiah en vai" ki chi ding hina pi'n, Lamnu pa kithuo pi d chi mai2 in jong chiel ngai lo a lutang phal jen a pang ding bang ang ngap sah mawh hi. Kin deu a, "Aw le" chi in, ann kuong ka imm pai ta uhi. Gil mul vang jen a neh thei khop a tui a ki huon hinanleh, Lamnu mai ahijieh ma ahi ding a, kuong 1 val ka ne sam sih hi. Pa Lien lai et pi pai in, Zodawn a lampi hoi deu tung na ding lai hi in ka thei hi. Jaan nai 9 tan anu le pa toh kaki houlim sam vang un, Lamnu gel na in ka lung sim ka tam seng jo tham hi. Nai 9 pel deu a lum ka hi vang in ka gim lam thei pha lo in ka lunggel in Lamnu a pai mang thei sih a, imud ding don lou ka mawh nui jel sam vang in, mi'n hing dap et leh a maw(insane) ang chi thei na ding khop in ka um giap hi. Sawt simpi tah tua chia ka um nua in, Lamnu ang lud phei ka mu mawh a, "Bang thu a tai le? Ka chi leh, " U Lal, nang ngai tah2 ei?" ang chi mawh a, ka heartbeat diesel auto gin bang phiel in ka thei hi. Gen d pen tah thei lou in, "Lamnu, bang ding a nang ginlel e? Nang a ding ahi pou leh kahin na chouh ahi ka it" ka chi leh a nui kawm in ka bieng ang tawp sah a, thakhat a ding doh in kabieng ma ang beh ging jot leh ka khang lo phut hi. Ka tahsa teng khosa a pum dim in, lu khuot veng2 a mai lit lou ngal bawl thei bang ma nei lo chu ka hi phot mai hi. Nai 5 ana pel hiau ta a, kei jong thou pai a innsung ka lut phei leh Lamnu'n singpi san ana awm min jou ta hi. Mai te phiet in kaki su sieng a, sinpi sa pim pem ka dawn hi. Singpi san mai2 ahi vang in, a buong mi dang bawl sang in ka lunggul na a lien jo hi. Tui tah a Lamnu singpi awm ka dawn jo inn mai ka pawt leh Pa Lien ana ding a, "Sang-inn va en vai e, Lal." ang chi a, ki jawh tou pai in, Sang in kava en khie uhi. Ka vah kawi2 lai un, Pa Lien in," Lamnu beh in tom khat beh hing ki thuo pi thei lah leh hoi d hia, na tang a June ha tan na sep phot ngai d avele, Chingbawi ang tung chieng in July apat ki thuo ta ve uchin" ang chi hi. Da mel po sim ang sah a diei mah, "Ni 1 ni 2 beh hing ki thuo p man sam na ven" ang chi be hi. A langkhat a kaki pah dap sam vang in, akho nua a kei ma gim na ding lel bawl ka himan in, ahithei tan a Lamnu toh ki gamlat ka sawm pan ta hi. Nikhat hoitah jong kithei nailou ka hi vang un, Ka itna puohkhop hiel a lien ana hita ahi man in. Tuani'n Lamnu niite ang haw ua, bawl bep um lo in admision leh a dang2 te buoi pi in ka ni ka su bei a, Anii tanu Kimbawi toh um khawm den phiel ahi man un, Lamnu hoitah in jong kamu kha sih a, ahin, kaki koi gamlat sawm hang in, ka lungsim ah Lamnu lim pen, Digital Camera 12 magapixel a ki la bang khop hiel a chieng in ka thei hi. Jin kahi toh kei sang a poimaw leh akinai jo te um jieh a diei mah ni 2 aum sung uh thei khah dan in jong ka um sam sih hi. A lang khat a ka ngai tuo leh Lamnu'n bang ngai dan anei de aw? Ka lung gel neu khat beh athei sam diei? Kei chouh tam bang a um a ama'n bang ma athei khah lo bang ana hileh a jum huoi sil pi hi lo amale chite in kaki daang koi sam vang in ka lung a luo den key hi. Aniite um sung in Lamnu U Steve lim jong ang puoh ua, ka hawh dah nalam in, apei nua un Lamnu van lah ah ka va mu kha a, koima ang mu thei ding um a ka thei lou jieh in hoitah a ka et leh, kei bang lou tah a mi ngat leh mai khaw sim leh gawng khat dan in ka mu hi. Ka et veng2 leh hampha bang kasa a, "Nang um kei le chin Lamnu kei a ding himaithei hia maw" chia gel kawm in, ka eng se ma2 hi. Lamnu'n jong anii te pei nua apat in kei bang a ki daang koi bang tah in ang maingal bawl lo deu2 hi in ka thei hi. A mai amu chieng in, a jum bang kasa a, ang houpi chieng in jaatat tah in ang houpi hi dieh in ka thei a, kei a ding in kaki koi gamlad sawm pen nop deu2 ding hi napi'n alang khat ah ka ngaina alien deu2 hileh akilawm hi.
February ni 5 ang hi tah man in Sang inn kai kapan ta uhi. Ani khat ni ahi jieh in, katawp bai pi a, Lamnu jong hing kai sawm hinanleh tawp bai ding jieh in kana khawl sah hi. A jing ni a hing kai dia kava gen leh, "U Lal, awl in hing kuon vang, ana makuon ve maw?" ang chi a, kei jong ka kuon suh pai hi. Sang in ka tun leh ka buoi khop ma2 a, mi 28 leltah ahi vang un, pawl tuom2 ngen ahiman un, aha sa dieh hi. Lamnu nai kal 1 jo vel in ang da'h kuau a, "May I come in Sir?" chi'n ang nui lud a, ken jong, "Yes Ma'm" kana chi tei sam hi. Hoitah a kichei a kamu pat jieh a diei mah a lut apat a tou na tan mit phe lo in kana en kilkel hiel hi. Nuol na ding a um vawt sih a, kamit apat laser beam vel pawt hi leh tun 200 nuoi suoh din ka ging ta sih hi. "Ahem...! Ang chi leh a khang lou jot kabang hi..
(contn) Jum sim kawm lah kithei sah ud sam lo a ka et phei leh ang nai phei jud a, ka bieng ang juud sah hi. "Ang ngai tah2 mawh dan ma amale?, ka ki ning koi a hoi hi e" chia a khut ka lahkhiet sah sawm leh "Chalk tham vang a bieng a bang sah talawm" ang chileh kei le kei ana ki pe hoi ka hi lam ka thei tha hi. " Bang class na la diei le Lam?" chia ka doh leh, " Head Masterpa chi dan2 hi lo d mo" chi'n a nui a, nui pi sam lou in," Eigel chouh ki um a kei a headmaster ka hi leh nang a headmistress na hi ngai lo d?" chia ka nui pan leh," Hi ma sih dia, nang na ud pou leh" ang chi a, kani ua ka nui uleh, ka gei ua naupang khat in " Sir, ama amoutha di atavele" ang chi a, Lamnu ka et phei leh nop maw sah mel puo in kathei a, ka lungkham na aki be jel ahi mai hi. Class lah d teng la jou a ka tawp un, ka ki jawh tou sam uleh, ka nua ua naupang ni ka dap hou ka ja kuau a, " Ki lawm u e mo?" a ki chi uhi. Lamnu ka dap et phei leh a nui hiau a, kei jong athei lo khem ki pang in, " Na U Steve khat vei beh hing haw lou d ama?" ka chi leh, " Pasienni chia ing haw d u akhu, anu le pa toh" a chia, kei jong a eng bawl ki pang in, " Ahem2! Ngah la gawp tave chin m?" ka chileh, nui kawm in " Bang dia ngah la lou d la, I damsung partner d khat chu" ang chi a, anui sam vang in kipah na tah2 toh nui a bang sam sih hi.
Nitah lam in Tuivai ah kisil ding in kava pei ua, mi tam sim pi ana um hi. Kisil dia kaki sah lai tah un ka gei ua Pasal hon lah a khat in, " Nou gel jong nu pa ma na bang ta sam ve uo mo?" ang chi a, kahe suoh tinten napi in sip khin khian ka sawm hi. Hinanleh, Lamnu'n ana jada ma2 ahi ding a, " U Thang nang toh iki khen jieh a maw mi mai a nang suh jum sawm? Ka U Lal in bang maw na anei a nang hi chi muolphou sah sawm e?" ang chileh, meikuong a thau tui buoh be bang in ka he na a pung jou hiel hi. " Ka U Lal" ang chi be nalai leh shi ngap khop a pang ding in ka man mawh a, Lamnu atang jou lou jieh ahi chi kathei be nalai leh ki ip jou nawn lou in amai tang en veng2 in ashu ding a tai phei chu ka hi tamai ahi. Thangpu kung tung man lou in ka bil buh tah aloite khat in ang na khet pieh a, kho ja lou in second 5 sung ka lu kim viel a kipei aahsi te ka sim phot mai hi. Ka kho jah toh ki tuoh in Thangpu khut hing leng phei ka mu a, ka ki hem khie hi ka chileh, ka nephu ana khang man jel hi. Lui a kisil nupi hon in a phawh uleh ka thuoh ding a beiphot khat ang suoh a, bangma gen tam lo a kisil sieng kin in ka pei tou pai uhi. Lamnu jong a lungthah seng a diei mah, vot sa adiei mah a chi aki ling in ka thei hi. Koima a ham jo bep um lo in inn ka tung tou uhi.
Ann neh lai in Nu Nieng in ka nephu pawm mu chu a hi ngei ding a, " Lal mi toh ki hau maw?" chi'n ang dong a, Lamnu ka et phei leh " Tuana na.." Thangpu, chi sawm hi a kathei jieh in kaham tu a, " Koi ma toh ki hau sing e, kaki sil na ua ka tui ki siem sah nalam a suong toh ka tawh khah hi" ka chileh Lamnu ana dap nui hi. Gingta ata diei, gingta lou seng a diei mah Nu Nieng in bang ma ang gen be nawn sih hi.
Ann ne jou room dang a tomkhat ka um uh Lamnu ang lud a, " U Lal hing ngai dam in aw? Kei maw na hi. Tua Thangpu tutan ang dei jieh a hi chia ang khel bawl akhu" chi in ka gei a lah tou ngam chet sam lou ahi ding a, chair kai phei in a tou hi. Ang et lo kal chieng a ka et vangud leh hoi kasah na a lien deu2 a, a hoi na ngen ka mu be hi. " Pasal te ki hu chi mawng akhu. Kei hilengjong ama sa huoi se jo veng" ka chileh lamdang sah mel deu in ang en a, " Innlam a pen hile chu hi chi thou ma va te maw" chi'n a me hiau a, " Lawm ngai sing ei" ka chi leh, ging tad lou mel po deu in, " Koi in ka ngai a chi ma dia" chi'n a nui be nalai a,nui kawm in ang pawt san ta hi. Sawt um nai lou leh pasal nei ding chi thei gia gua hinanleng Lamnu ud ding hileh taipi mai khawh kasah lou hun bang a um mawh hi.. Ka mang beh a mu tei sawm in ka lup kuon in Lamnu..lamnu.. Chia kei ma jah khop ding a 10 vei vel ka gen sam vang in ka mu tuon sih hi. School ni 2 ka kai jom tou ua, ka ki nai na uh a lien deu2 hi. Kaki koi gam lad sawm deu2 leh ka it na alien deu2 a, ngai tah pi in ka ngai mawh ta hi.
A mel ka mu mai2 in jong ka mai ataisah jou a, alungthah lai bang ang nui sah thei mawh hi. Khat vei2 bang sil hithei guol lo ahi chi thei na pi in ka lung sim a um teng gen khiet ka ud mai hi.. Kiginni a Pa Lien toh gam ka pawt sam hang un, Lamnu gel na in sun tung tawn in ang mai tai sah jo mawh hi. A langkhat a lah Pa Lien in a thu gen te nal sa a nui2 dan a ang gel jieh a diei mah ang houpi mun ma2 hi.
Pasienni ang tung ta a, Minister hing haw ding bang hiel in Nu Nieng a buoi vawt hi. Pa Lien ang lud a," Jingmawng nai 7 a hing ki pan uh ata khu" ang chi be na lai leh, a buoi na kal ah abuoi be deu2 hi.. Nai 11:30 in Lamnu'n Singpi a awm a, Nu Nieng in a mepi ding mansa in table ah a koi jou tham ta hi. Nai 12:39 a gin tan in jong koi ma ang tung tuon sih hi
Nu Nieng ka et leh tou muong thei lou in a dieng let2 sam, Pa Lien lah khomuol lam en jou in 3 vei ving veng ang ki le kia ta hi. Lamnu jong a lipstick san pimpem a muol phiel gawp vang in a hoi na ake tuom sih hi. Ka nai ka et leh nai 1 ging phiel a hi ta a, inn mai a juntha dia ka pawt leh Pa Lien ang naw tai phei kamu a, " Ang tung dan uh hi va e." ka chileh Nu Nieng ang tai pawt pai a, Pa Lien toh aki jawh phei kia gel uhi. Juntha jou ka lud leh baa khat nua in ang lud ua, Ka gin tad khel a gawng leh ngou tangval sang sim leh a nu le pa dia ka gin tad mi 2 toh Pa Lien leh Nu Nieng ang lud uhi. Gim mel deu po kawm in, " Kichai vawt e, na khuo u jong ki tung thei lo.. Nua kawm ha ven maw?" chi in ang tou a, Lamnu en in, lungkim mel po kawm in anu le pa tou na ding a awng sah hi. Kei ang mu hoi tah in, Ah gul mu ma a bang a, "Na U mo na nau?" chi'n Lamnu a en phei a, Lamnu'n ki suong la mel po deu in, " Hisih, Sangsie pa hi bou" a chileh ka na ka sa mawh ma2 hi. "Na sanggam te la leh?" a chi leh, Nu Nieng ang ham a, " Ama nuoi a nu Chingbawi Lamka a anau Mimin toh lai sim a um uh akhu. Ni 16 chiah hing pei ve un Steep" a chi leh kei ma ang en a, nop maw kasah sim toh ka ding phei a, Chibai buh in ka room lam ka lud phei a, ka limlang la a kaki et juai leh ka mit hi tui ang pawt mawh a, kin deu a sia khie in ka laibu puoh sun2, ' Two States' ki chi, Chetan Bhagat in a gel ka phen a, bawl ding tuon um lou ahi man a ka sim sam vang in ka bil in athu gen teng uh a ja kiau kuau ve2 hi. Ann neh in jong amau toh ka neh ud lo man in kisil ding in ka kuonkhie a, amau man jaw in ka ngen in ka ne hi. Lamnu lah kuong hem dia va hat hing nuom lou ding ahi chiah chia ka kuong ka hep sawm leh ang mu chit chiet a, aki hou kim lah tah uh hinanleh ang taiphei pai a, ka nua et leh Steve in hoi tah a hing en ka mu hi. Ni tum kuon lah in Steve phone ang ging a, inn mai a va pawt in ka room gei ah ang dap ham a, ka um lam thei lou a diei mah, adap ham kaja thei hi. Kei jong baang bil a va pang pai in ka ngai dap leh, "Mawi, kei tu a ka khua ua um, jing ah aw? Dah bang ja ala?.... Dah 8 beh a la? ... An ing na huan kep ou." chi teng ka ja chieng ma2 hi. Bang thu poi maw a Jingmawng nai 8 a Lamka a del sawm ahia le.. Chia ka ngai sud lah in ang lud kia a, " Nu, kei ka pei kia ngai di" a chi a, " Bang dia la aw? Bangthu um e Steve?" chia anu'n a doh leh, " Ka lawmte khat Hospital a um damjou lou d a chi uh jing kal dah 8 ma a ka tung tei2 ngai d" a chi a, anu'n aging ta ma2 a, " Aw.. Poina e maw? Lamnu toh hoita in ki thei phot le uchin hoi di hia.. Na pei ngai d avele.." a chi be nalai hi. Tua lai tah in chuh dieng lud phei mai a, "Momawi maw na lawm te? Nang mi suol, na dei lou leh hoi deu in gen o, Lamnu a dia shi ngap ka hi. Nang bang miduh dah lou ki apmai na di nasah e?" chi a a inn kuon ua naw doh d bang ka ud sam hang in bawl thei chu a sam sih a, mai san pim pem a khut tum jiel lou ngal ki he nem thei na ding bang ma dang a um sam sih hi. Inn mai ah apawt ua, Steve va hakhie ahi ngei ding ua, adang teng ang kile kia uhi. Nu Nienh e, Pa Lien beh in lamdang sa lou uh a de aw? Chi bang ka gel a, Zodawn khuo tam bang a gam la sa pa'n bang ding a ajan tha2 a pei ngap e? Chi vel a ngai sud kha d uoi? Chi te in ka lung a buoi sah khop ma2 hi. Koi ma kua gen kei leng jong Lamnu kua ka gen sawm a, jaan khovah phiel in ka imu thei sih hi. Lamnu ka hepi na alien deu2 a phuol gu thei din mun a um in jong kaki ngai nawn sih hi. Ngai tah2 in ka ngai a, ud ding bang hileh tua jan ma2 a tai pi mai bang a lunggul phiel hi.
Jing mawng in Steve nu le pa leh Pa Lien te nupa inn mai ah ana tou ua, ka tho in nai 7 ana pel tham ta hi. Mai phiet jou ka pei phei leh Lamnu ana um a, " U Lal singpi dawn ou" Nang a d kang bua keep diei ma?" ang chia ka thu thei ka dap gen sawm sawm a kanai phei leh " Bang chi nasa ei leh" ang dap chi a, a lunglou lam hikhaleh ka chi man in, " Hoi ma2 e, ki tuoh jel uchie." ka chileh anui sam hi. Ann aneh jou2 un Steve Nu le pa te a pei kia ta ua
Lamnu kung a gen ding ka chi sam hang in " Da chiah, nang dei man a nang gen hi" ahilou leh ing pawng gintad ta sih leh bang suoh ta ding? Chite ka ngai tuo na lam in Tuani chuh a gen lou khat ka hi tahi. A jing ni khuo ang va'h leh ka gen ud na akiem deu2 na lai a, Lamnu'n " Bang dia Jania hing gen pai lo la?" ang chibe giap de aw.. Chite jieh jong hithou in ka thuguh thei a dau deu2 mawh hi. Sawt lou kal in February ni 16 ang hi ta a, sun nai 12 pel hiau in Lamnu naute gel Chingbawi leh Mimin ang tung tou ua, a lawmte uh mi ni toh ahi uhi. Nitah lam kisil hun in Lamnu toh kuon khawm ud tin ten nan leng Mimin a um tah jieh in nidang bang lou tah in Lamnu kou nua tham a kisil ding in ang um san a, ka it ka ngai na tuikhang lien bang ma nan leh aki gam la deu2 chu ka hi ta mai uhi. Ni dang a kaki dap koi sawm lai bang lou tah in kaki mu tawm deu2 ua, hou jong kaki mawh hou thei tuon sam sih uhi. Lem tah a ka ki hou thei lai uh anop dan ka thei chieng ma2 ta a, ki sia chite mai2 in ka ki kho nua sia dan a gen bukim thei sih hi. Chingbawi jong mi mel hoi leh duong ching khat ahi a, alang khat ah Nu Nieng in ang dei sah bang sim in kaki tuoh khah na ding uh thute bang gen mun sim in ka thei a, khat vei2 kaki ngai tuo leh pasal nei ding khat ngai a ka ki suh genthei mai2 sang in ang kei deisah khat toh ki lung tuoh tah a um khawm ding bang ka gel sam hang in ka lungsim apat Lamnu paikhe thei ding guol kahi kei hi. Lamnu toh ki gamlad na ding sil ka gel khah leh ka it na a lien jo deu2 a, nai kasawm chieng in alien jo na lai hi. Mou hahkhiet na nei ding in mi tam sim tah ni 17 ni in ang pei ua, Steve a tel sih a ang jing pei ding chithu ka ja kha kuau hi. 18 ni a ding hinanleh a mun gamla ahi man a hing ma pei ahi sam uhi. Tambang sil te ka mu leh Lamnu pum mat mai a tai mang pi ka ud mawh hi. Sil hi thei hi a ka thei lo jieh in ka tawp san ham a, khomiel in ka ngen tang in Bieh inn muol a baakhat tou juai vang ka chileh thei lou kal in jan bang ana sawt man ta a, kamai ka jud leh kamit hitui ana pawt ahi ding a, tamlou ka jud kha hiau hi. Bieh inn muol a um den mai ka ud a, khat vei2 kholam a jan pei mai ding e, chi bang ka gel tei sam hi. Ka Nai ka et leh nai 11 gin na ding minute 12 in in avat hiau a, pei dia ki sa ka din khiet leh ka nua ah mi khat ana ding a, ka mit nuoi juol a ka hoi et phei leh Lamnu bang in ka mu a, kagin tad lou seng na lam in a mai a sam kai suh ka huoi phei a, hoi tah a ka et leh amit hi tui luong ka mu a, sia khiet sah in, kipa sah tah in, " Bang chi, jing chia hing ki hakhe ding tutan hilah pou a kap sa avah kawi la?" ka chileh, " U Lal, Ki thei maw bawl ding sil bang ma a um nawn lou pi, nang ngai na sang in kei kang ngai jo tham hi" ang chi mawh a, akap ging hi. Nai phei in ka kawi leh ki phel khiet sawm tuon lou in nah pi in ang koi be hi. Ka lung buoi seng jieh a diei mah, " Nang ngai leh tai ding hi" ka chi leh. " U Lal, ahi thei lou na thei vele, bang dia nang suh gen thei sawm2 la? Hepi tah in ka hun beh hing uop sah in aw? Tunitah bang in hing ki hep khiet san sam sin aw?" chi toh akap na lai a, niel thei sil ahi sih a, niel lou ding in kei a ding in sil et ha pi2 jong hing um ding ahi chi thei gia gua nanleng, "Awle Lam" ka chita hi. Jing kal khuo ang va'h a, khosung pa te leh Hausapu tu le ta te'n sa abawl pai ua, in lam ah nungah leh tang val te hall jem in a buoi thei ma2 uhi. Keilah Zodawn huikhi puul dou ka mit kau koi tei sam hi. Programe neu2 te nai sawm in aki pan a, Steve leh a lawmte en a Lamnu gang a dieng suh ngong vang in koi ma ang dawh tuom sih hi. Steve nu toh upa te aki hou uh ka gal mu a, Lamnu lah ama ngen tang in a tou kin ken hi. Lim kap ding ka lung gul sam hang in Ka Nokia handset 1000 mante ahi man in akap lou kahi phot mai a, ka ngen tang a chair khat a aning lang a tou in alem thei lai teng Lamnu ka en jing hi.
Bang thu gen a kidap hou u e chi thei sawm sih nan leng buoi na khat chu um ahi ngei ding a, Lamnu nu le pa jong a maisan pim pem sam uhi. Puitu in a hun a la jom jel a, Lamnu chuh a U Steve um lo a hah khiet ahi ta hi. Nita'h in Shaktiman khat ah aki lom puoh suh ua, kou lawi a jing pei ding mi tam lou ka um uhi. Khuo ang miel a, Upa Khampu te in a ann kava neh sam hang in a tuhna a geina ka thei jou sih hi. Jaan ka lup hang in imud jie a um kei a, ka tahsa kim khat um lou ka bang ve vaw sam hi. Mit tui lah thei lou kal in ana sau tung suh thei man ma2 a, kinepna dang nei nawn tuon sam lou in ka jaan hah khovah hi. Jingkal ka thaw in ka mit a kau gawp in ka thei a, Upanu'n Ahtui khat ang pieh dawn in ka it pen leh ka ngai pen Lamnu kiteen na uop ding in nai 4:30 in ka jing kuon suh ta hi. Pei lou thei hileh um ud ma2 ka hi jieh in ka kin naw sam sih a, ka nua ah mi phabep jong hingpei ahi man un angphah lou na ding tan un ka pei suh hi. Lamkaal ah ngai dan mu mal nei lou in ka am suh liei luoi a, innlam pei suoh mai bang ka ud tun2 hi. Hiengtam nai 9:30 in ka tung suh a, kaki puo lou na sawt sim gawp tah jieg in ka kha mul a sau a ka luui suh ma2 hi. Bieh inn lam ka jot tou pai leh ka sinpi dawn na nungah nu'n mikhuolte ann ana pie a, ne tei ka ud sam hang in ka ne sih a, mun khat ah ka ngen in ka tou hi. Nai 10 ang gin toh ki tuoh in Chowkidar pan dah ang sat a, kalung tang sia a kidawt bang in adah gin toh ki tuoh in ana hi. Ka khoda'h suh leh Mipi a nua ua pei in Lamnu toh apa ang ki pui tou ua, Steve in smart deu in mipi phabep toh Bieg in sung ah ana ngah ta uhi. Lamnu ten ang nai tah un ka en ngam sam sih a, kimu sah lou ham sawm a ka dap up sawm leh Chingbawi in ang mu a, " U Lal, bang chia hing tung suh la? Hingpei ou" chia ang hat leh Lamnu jong a maikhu nuoi a pat in ang en phei ka mu a, Lasah siem deu khat hileng " Beautiful in white" Shane Filan in asah bang sah ka ud mawh sam hang in ang lud san ta hi. Keh jong amipi te lah a va tou lud sam in, kamit tui pawt ding veng in ka mai ka phuol bawl hi. Lamnu ka et jel sam hang in kei et lou ang sawm ahi chi kathei hi. Baa khat nua in Pastor pan Lamnu thu a dong a, " Nang, Lienhoilam in Steve Hausuonlun toh nakal uah a sieng lou bang ma a um sih a, na dam sunga na koppi ding leh nop ni dani a taisan lou ding leh gin um ding in Pasien leh mipi mai ah na ki chiem ngam ei?" a chia, " Ka pom ngam kei hi" hing chimawh leh ka chi sam hang in " Ing, ka pom in, ka ki chiem ngam hi" a chileh leitung a kahin man um lou phiel in kaki ngai kawi mawh hi. Steve kung ah Lamnu adoh bang in ang dong kia a, a dawn masang a pawt khiet sawm a Bieh inn mai ka jot phei leh Car san khat ang ki nga a, a sung a pat in Nupi gai khat hing tai pawt in Bieg inn sung ah ang dieng lud pai a, Lampi ka ot leh a tai lud phei suoh a, ka nua et leh Steve mai san pem pom kamu hi. " Tami pa Dansieng thou a ji nei ding in mipi leh Pasien mai ah a sieng sih hi.. Ka gil a ka naupai ama a ahi" chi'n ang kap khe pieh puoh a, ka lung lam bang tah ahi jieh in ka tou na lam jot kia mai ud nan leng ka ding gaw den phot hi. Steve in " Bang gen a kinei la nang? Hakhat mawng2 a nuol nang a hun ki pie a bang dia tu a hia hing din kawi la? Mawite" ang chileh ka thu thei a chieng kuong ta hi. Akhat nu jong sip tuon sam lou in " Ni vei hil hiel ka pieh ahi. Na inn kuon un ki thei maw bawl sih un. Na Upate uh tami lai phuol mang te'n jong a paap na puoh ding uh ahi" ang chileh Upa khat ang ding khie a, " Hausapi'n a puoh ding ahi. Kei maw na bang ma um sih" ang chi leh Mipi te leh mou inkuon te lah bawl ding leh gen ding pen bep thei lou in a son2 ah a mot ham jah gawp ua, koi ma thu gen ki ngai tuo bep um lo in a ki mai kawh toh, aki shu sawm toh ang ki teh ua, thakhat in Pastor pa'n " Tami kitenna nuol ahi" ang chileh Lamnu'n ang en phei a, ang del phei sawm a ka mu jieh leh hing del phei mawh taleh mipi mawsah tan law thei na ahi man in amai lang ah kaki hem khie a, mi ada a aka lai tah un kei mit ah kipahna mit tui a luong hi.
Tu le tu in Lamnu toh kaki teng jou ta ua, ka nupa un Zodawn Jr. High School ah ka sem khawm le2 uhi. Last but never the least, its an open secret! Hmmm... . ? We are expecting a baby next March... ! ! ! Hope u njoy da true story.
Elbee Zou, The 16th of October, 2013
NOTE:
Tami Thangthu ahi leh Admin phalna bei aa Copy sawn ahi theisih hi.
