AW COMPANY A NASEP MAW..

By. P Hangmuanlal Zou (aka P Lalboi Zou)

Kristmas mangdingin inlam (Lamka) katung a, sepna ka munua a inn kaphahpatna ahijiehin lawm-le-guol, hattuom mite leh ang ngainatu khenkhatte ang vaah uhi. Houlimna leh kikhopnate neiin tuana deisahna toh dotna kamu kamanghil theilou khenkhatte -

 Aw Company a nasep maw…. Solkal/ Government kaam khatbeh hiva kichia..
 Government kaam hoitah geldoh dingin naki singsa naima? Tuana bangtan nahun nazatbeisom ahia, kingahtheina tahtah hinamo?
 Ing ki muongvot in bangdia tuana koima theiphahlou khatpou a lungkim nahia?

Tunidong in tambang dotnate ang deisahtu khenkhatte apat kamu zepzep nalai a, dawnna dihtah leh apoimo bang a hilchetna pethei a ka om jiehin Pasian min kaphat hi.

Kum 8 bang kasep nuain, Corporate/ Company/ Private sector a alung lut tapou lutin, sangpitah tunsom in midangte zong hilson son in puilut thei nalai lei uuthuoi kasa hi. Ka ngaisut jel a, bangjieh a I Nu-le-pate ahilouleh ang deisahtuten Corporate a semdia deisahnathu ing genpi behlou uh adiei? A peidan I thei thuuhloujieh uh adiei? Koima etton theiding leh ang thuhil theiding khop a anasem aomlou jieh adiei? Oleh kingahtheina ana hilou mawng2 khat adiei?
I dinmun leh I sepnate uh en vengveng kawmin angki deisahlou jieh hiding a kagintat na jiehte tamlou anei abangin kang guol suh hi. Tamtepen Private sepna Government a sang a hoizo china hilouin, ei mi tangpite mudan leh theidan kang tahlatna ahizaw hi.

1. Pension & Pay Structure – Government a semte’n a retire nua chiengun zong Pension plan hoitah mu ua, adamsung a nehding buoipi nonlou phiel uhi.
Private ate ahileh Pension plan omlou a, ahatlaisung ua aki kholtawm sih uhle tehnung- vuoinung a thil hamsa leh buoihuoi tah hiding ahi.
6th Pay commission omnua apat Government leh Private a semte halo kikhietna omnonlou a, Government a ma deihuoizo tham hi.
2. Job Security - Government sepnate ahileh kitawpsah phut chi omlou a, na hatlou-damlou niin zong na sepna buoiphalou hi. Zi-le-taa etkolnang a sepna det leh kingah theina ahi.
Private ahileh sepna det hilou a, dei hunhun a kitawpsah thei. Recession bang ahilouleh mimal sepna Company in abawl hoilou hun a zong kitawpsah thei phut ahi.
3. Holidays & Working hours - Government sepnate ah nasep hun bikhiet hia, hinanleh Private te ah mimal ut le utlou thu omlou in nasep zaw masang overtime a kisemsah hi. Tua mabangin Project deadline nei a nasem te ahijiehun Holiday deibang in mutheilou uhi.
4. Popularity & Respect - Government nasemte a dinmun (position) leh thilbawltheina (power)te jiehin a nuoi aten zatat mama ua, insah inhang nangawnin theipiin zatat uhi.
Private a tuabang a ki zatatna leh minthannate omlou a, koima insah inhang ngaisang leh theiphah zong hibeh lou hi.
5. Inevitable salary increment & More Facilities: Government sepnate ah nasep hoijieh, siemjieh leh hatjieh sese hilouin, sepsawt(experience) dungzui a halo(salary) khang ahi.
Eiloi mibang a siemzou tah2 loute (average performer)a dingin tambang sepna ma ahi I pii bawl dinguh.
Private ahileh nasepdan (performance) lieu2 a kinga ahia, promotion mulou a na experience tam khu thilhoi ana hilou hi.
Government a semten facilities zong private te sangin hauzo him2 uhi.

Tam atung a ajieh hiding a ka guol tamloute ahileh ei mi vantang ngaidan leh theidan ahia, adihna chang tam mama hi. Hinanleh ithei siemlou uhleh thei belap ding tampi om a kathei jiehin tam anei abang in tamlou kang guolsuh hi (guolding tampite lah ah).

1. Pension & Pay Structure -Tulai Government sepnate atamzo Pension plan omnonlou a, eima mimalin hoi isahdan a kibawl mai ngaita hi. Pension thu ah Government leh Private sepnate akikhietna tu dinmun in omnonlou phot hi.
Halo (Salary) lampen kibang phiel ta a, hinanleh private a nasephoi nahle nalo khanghat zotham ding hi.
2. Job Security - Eimi asem tamzawte lunglut leh tupna tah toh Private sector a luut vang mama. Innsung hasat jieh a va semzuol, competitive exam tuomtuom gelkom a semzuol etc. Sepna- nehholna khatpen anopvot chi vang mama a, thanuomtah a I sep louleh loching dingpen hamsa mama ding hi. Nehzonna ahijiehin sepna dangteng sang a poimo ngaizoh a, sepding ang lamet sangua sangzaw a sep ding ahi. Nasepna a mi hakatpente koikoi company hitaven, Recession hi’n Lay Off omhun hitalezong kimawh pailou ding hi. Bangbang sepna a athasepen leh siemloupente koiman deilou hi. Ut hun2 a kitawpsah chipen asiem ahakatte tungah a tun masangin a siemloute tung ah tung masa hi. Company khat a asiempente akipai khiet hiel ding khop a Economy ang kiet chiengin koima sepna dangte zong vadet tuonlou maithei maw.
3. Holidays & Working hours - Tampen Company a semte a dingin a process a kinga in kathei hi. Software, IT hi’n BPO hitaleh Back end processte ahileh Holiday dihtah in a zuithei ua, Operations lam ahileh huchi khollou maithei, ahin nidang a lahthei hiveve ding hi. Private sector a Field dang - Salon, Sales leh adangte ka thei tamloujiehin ka genthei chet sihhi.
4. Popularity & Respect - Amasapen a Corporate sector lutding a loching ding ihileh I tupna akichet masat poimo ahi. Mipi vaihawm ut ahilou leh minthanna dei a lut ihileh bawlkhiel kha maithei. Amabou lungkelou a ihapan leh sangtah tungthei tham ahia, iki nepphalou tanin zong miten ang thei ding ua, hauzong I hauzo theitham ding hi.
5. Salary increment & Facilities – Tampen I ngaidan uh dih kasa hi. Private sepnate ah halo khanna dingin Experience a kingalou a, performance a kingazo hi. Asiempen/ ahapanpen ihilou a promotion bang mulou a isep den mawhleh Company a dia metna omlou a, sotpi zong semtheilou maithei. Ei sang a naupangzaw, siemzaw leh pilzaw, halo tawmzaw a semding Company kitasam lou ahia, tuajiehma a tupna tahtoh I seplou leh Company a loching chipen hamsa mama ding hi.
Facilities lam ah Company atuom dungzuiin kibanglou a, atangpia etin Government a hoizo tham hi. Hinanleh Company thupitah Apple, Microsoft, Google etc. chite facilities piehdan Government employee te a sangin ana hoizo kiajel hi.

Khaile! Bangteng hitalezong Sangnaupangte’n i phattuompi khahle china toh kei mimal thilthuohte leh ka sepna lamdeu toh kisai neukhat kikup khawmna nei vaui.

I LUNGLUT LEH SIEMNAPEN KIZUI DING:
Tunidong a I gam peidan khat ahileh Government/ Solkal sepna ma del tinten ding chi ahia, lunglutin lunglut kei taleizong ang deisah taphot ten Solkal nasep ma ang kawhmu ding uhi. Thildihzong ahia, reservation bang inei nalai jiehun bawllou a umding pen thil mothuoi bang ahi.
Nu-le-pa khenkhatten amauh deina bang ahilouleh amaun ana zawlou uh zoudingin a tate nasatahin a tawsawn mawh uhi. Tampen hoimama bang nanleh a langkhat a a tapa/ tanu maban suhsietsah bang ahi khahding uh lauhuoi ahi.
Kagennop ahileh, mabaan saupi neilaite ihijiehun mite thuhilna leh deisahnate hoitah a ngaikhiet a, nelsie louding, hinanleh atawpna a thutanna eima khut a om ahi chipen manghil lou ding ahi. Eiman I maingap leh I thanopnapen, I siemnapen toh kituoh ding sepna/ mabaan kizui ding ahi.
Lochinna chipen sepna hoileh Lo (Salary) tampi laah ana hi sese sih a, kipahtah leh thanuomtah a naseptheina ana hizaw hi. Sum-le-paite poimo mama nanleh eima mimal kipahna leh thanopna khel in ana poimozo lou hi. Lo tampi loin, dinmun sangtah tu, hinanleh nichinin nasep ding huphul leh peilou in om talei bang ahiei aphattuom nading?

Ka naupanlaiin Doctor hiding kana ut mama a, hinanleh Math’s leh Physics ka lunglutpen ahijiehin kang pichin sim nuain ka lunglutna ang tuom a, mabaan ding ka lungbuoi hi. Tambang dinmun a kang omin ka lunggel a om ahileh - Eilam adiehin Lamka tuol bangah profession tuom2 a etton ding leh mi thupi tahtah inei chiet ta ua hinanleh Corporate sector lam him2 a sangtah tungleh mi thuhil theiding vang mama. Tami lunggel in katha athousah a, mite seplou khat semding leh nikhat nichieng a mite thuhil thei leh manaw thei ding lamet natoh Corporate lam ah luut dingin thutanna kana la hi. Tuni chiengin sangtah tungzou naising lengzong Pasian mapui natoh kum 8 bang kasemta a, ka kisia vatun na aom naisihhi. Mabaan pen genthei hisih nanleh Pasian jalin ka nasep ah kalungkim a, hun awl kahau a, ka thanopna tuom2 (hobbies)te bang boltheizingin ka om hi. Hun hamsa leh lungkiet hun a om tham a, hinanleh keima thanopna ahijiehin koima buoipi ngailouin kei le kei ki hasot jelin ka peitou theijel hi.
Steve Jobs in “The only way to do great work is to love what you do. If you haven’t found it yet, keep looking. Don’t settle” ana chi hi. Insung hahsat jieh a semsuh thop/ zuithop, mite gen jieh a semsuhthop, alemlem semsuhthop chite I chiin louding ahi. I thanopna leh siemnapen I thei angai a, tuami khu zuiding ahi. I thanopna imu naisih lehzong lungkelou a suitou nalai ding ahi. Athutop a I loching zou tahlouzong ina try khah him2 pen ki letsahpi tah ding ahi. I lunglut napen leh lunggul chet izui khahlou leh `Ana huchi kha taleng, Ana bol him2 taleng’ chia iki sia dendon khah dinguhpen thil deihuoilou vawt ahi.

LUNGKE LOU A PANG TINTEN DING:
Min ang deisah bangtah izuilou a, eima deina bang I zuichiengin hasotna sangin housietna leh enghounate bang itang zaw maithei ahi. Lungkietna hilou a ei-le-ei ki hasotna a zat zosop ding
ahi. Nikhatnichieng a amauhten a tate/tute sepding a adei ding khophiel in nasepna ah hakat a loching somding. I loching pailou maithei, I lungke maithei, hinanleh tuahunlaitah ahi I thanopna jieh a ipang tinten hun.

Lochinna dingin Nasep hakat angai a.
Nasep hakat nangin thanopna angai hi.

Thanopna inei nahle akim khat zawsa ahi.

Corporate a kalut tungin ka lungkiet hun anatam hi. Kolte lah a ki maitaang zoupailou, amauh bang a kisiem zoupailou, ki felzoulou, promotion ahuntah a kimulou, tamteng banah topsan a Competitive exams gel ding beh2 hasotna kimu zing. Tambang hun a ka phohdoh thatha ahileh, kei deina bang a sepna toh kisai thutanna latavet kahileh, ka nasep pen amin a sep a, hachin a lolah mai2 pen hunlou, bangmatan kitunglou ding chi ahi.
Tuachiin theitop suoin pan kalatha a, ha 4/5 vel zouin seppite sangin banglamteng ah ka tungtuong zaw hi. Tambang a huntawh kakisah laiinzong kol-le-vai lah a sem akihijiehin promotion hun bangin kimu thepthup lou mawh a, halo bang lunggul bang a khanglou in ang um hi. Lungkiet huoi nanleh nasep hoipen topsan louin kapang tou tinten a, kumkhat nuain promotion piehin kaom hi.
Sepna mun khatphot ah Politics pen aomlou theilou, deisahtuom aomlou theilou. Tunia nasep hatpen leh siempen hilei zong ideibang a kaisanglou maithei, tuahun ahi lungkelou a ipang tinten hun. Lungkelou a ipantou nahle I nasep hoite leh agaate koiman nelsie theilou ding a, atawp ah a gaate aat teitei ding ihi.
Sepna hin siemzilna hitaleh chiin teitei dia poimo kasah mamate ahileh –

 I sepna/college kaina mun a agam mite omdan, tawndan leh hamdan bang thei leh kazil a, zatatpi ding
 Apoimo hun a sem dia mansa a om gige ding
 I septoh/simtoh kisai (process/ subject) midangte sang a masterzoh/siemzoh som ding.
 Seppite leh Managerte/ Teacherte toh kihouthei a kituoh som ham2 ding
 I siemlounate zumpi lou a, a asiemzote apat zilkhiet som ding.
 I singtang lungtang (Lungtom, milah a hamngamlou a zumna etc.) te ahitheitan a paikhiet somding.
 Bangchituh in siemin bawlthei leizong, kiniem khiet gige a Pasian manghil louding.

Nidang a mang a zong matphahbanlou, Company thupitahtah leh kol mipil misiem tahtahten `DREAM JOB/COMPANY' chia ana minvaw uh YAHOO leh GOOGLE te bang ah kasemthei a, Pasian hoina thupi kasa hi. Pilna leh Siemna jieh chouh hitaleh muphah leh sepphah ding guol ahisihhi. Pasian phohkom a lungkelou a nasep hakat pen losap chi omlou hiel ahi.

I KIPATNA BULPI MANGHIL LOU DING
I gamsung hahsat jiehin metro cities te ah I nei-le-neilou thu hilouin i lengsuh duup2 ua, i tuntung ua ki lawp mama napi’n hun hing peijel in metro huikhi in ang zapmang jel hi. Tuni’n zapmangte lah i tel tai ole a kilawp lah ah? I peina jieh theizing a, i kipatna manghil lou ding ahi.

I Nu-le-Pate’n neilou shasha inmun-loumun zuazen a ang etkol zong ahimaithei a, eiloi nopbawl leh nopchet thei ding dinmun a ding ihi sih uhi.
Ka puohnat mama khat ahileh, nu-le-paten neila sha sha a chom vevo uh, amauh lah a omna mun uah nungah-tangval buoi a ana buoi mawh, noplenna leh partyna a sum-le-paite ana zang suh gawpgawp. Tulai dieh bang a tangvalpa/nungahnu jieh a kingasie in maani kithat (suicide) bang om tou son2 nalai. Poi mama maw!!
Eima mimal a ding I khuol keilezong Inmun a eitung a kinemtah a chintuigu kangzen a pangte ding behin hapanin, lochinna del vaui.

I hinkhuo mabaan eima mimal khut a kinga ahi. Tulel a I deibang I tung naikei maithei, losam iki sa maithei, lungkelou in pangtou vaiin, I mabaan ding eiman siemhoi vai. Eima louin koima midangin i mabaan ding ing siempieh theilou ahi.
Pasian in Mabaan ah loching tou thei dingin ZSPte hing umpi in, guolzawl tahen.

“Your life is in your hands. No matter where you are now, no matter what has happened in your life, you can begin to consciously choose your thoughts, and you can change your life.There is no such thing as a hopeless situation. Every single circumstance of your life can change!”
- Rhonda Byrne

Twitter