Dawi leh Kau

1. Theilou Zousie Dawi kingaw
I Pu-le-paten azieh-ajal a thei zoulou uh sil khat pouma dawi bawl ahisah uhi. Tahsa damlouna chi tuomtuom leh mihing shina azieh a thei zoulou zousie uh zong dawi ma a ngaw uhi. Gamlah a sing leh suong piendangte, tuibihvei, situi, tuivamit, kawlsie leh guomsete nasan dawite umna a ngai in a zau thei mama uhi. Innmun leh lougam ding a tel chieng un zong, dawite lunglou lam a bawlkhah ding uh kivennan siempu zang in aisan masa vadep uhi. A aisan uh a phatlouleh a tawpsan vahiau uhi.

2. Biehna hing kipatdan
Innkuon khat damthei a, innma-louma a a vangphat theina ding uh ngaisutnan innsung dawi pusa-pasa chia minvaw in biehna a nei uhi. Tuachin leitung a midangte mabang in, Pasian thu a na thei masang un zong mihingte sang a thupizaw mutheilou silbawltheina nei bang amakhat um ngei a gintatna a nei zieh un pusa-pasa gentahlou singzung-suongzung na biehlaw uhi.

3. Dawi chi tuomtuom
Dawi chi tampi a phasah uhi. Mishite hagau pen tam leitung ah um in vahle a, mite sol in suna thei zel uhi chi ahi. Tuabangte khu shiha ahisihleh thadam a chi uhi. Natna neilou ahisihleh na masa selou a thakhatthu a shiphutte leh gamlah a tuohsiettuoh a shite khu sashi a chi ua a zau thei mama uhi. Misau khenkhatten Zoumi zong a chi ua, muthei a um tualeh mang thei zel, agol asan a sang gamlah a um ahi chin a gen uhi. Tualeh gamkau ahisihleh kausemeide kichi pawlkhat a umsah kia leuleu uhi. Tamte pen zan chieng in meikuong in a kilang uhi.

4. Pusa-pasa
I pu-le-pa shisate hagau a lungdam sihleh, kidamtheilou chi’n innsung sutzung ah amaute na bie uhi. Tampen Pusapasa biehna na chi uhi. Dawi na umkha tham ding hi. Laisiengthou in zong um hi chiin ang hil hi. Tuinpen amaute sang a theuneizaw Pasian in gintat tah zieh uleh silbangkim abul-le-bal i theichiengta ua, dawite i ngaw nawnsih ua, zong i damthei nang, i vangphat nang chite ah i pan nawnta sih uhi. Tuachiin amaute zong muphah leh zahphah in ang kilang tasih uhi.

5. Kau
Ahivang in tuni tan in mi pawlkhat in gindan lui nuasie theilou in Pasian awi ahilam uh nasan mangngil zen in dawi chi khat kau chi a minvaw in shigiin in a giing uhi. Tuapen guolluiten kau chi ni um in khatpen in ki (horn) nei in mihing sung ah lut in teng theilou hi. Khatpen ahikialeh ki (horn) neilou in mihingte sung ah lut in tengden thei a tua mihing pen hah-le-suonten a khangkhang in neitou zel uhi chi uhi. 6. Kau hing kipat dan Kau hing kipat dan hichin a gen uhi: Chillai in khuo khat ah mi neizoupa khat in kithoina ding in a tute leh a innsungmite kho dang khat ah siel (mithun) valei a kai ding in sawl hi. Tam sielpi sun nisa nuoi ah lamsuh-lamtou ang zawtpilai un gim kisan ang hamkheta hi. “Katei-aw, gim vangut sam ing e, inn kitung lelah hing kithat ding hinalai” chi in. Zau pumpum in siel pen hing kai in inn ang tut uhi.

7. Kaunei
Tam sielsa nekha zousien kau nei ua, a khangkhang in ahah-le-suonte un neiden uhi chi uhi. Kau kilawsawn thei dan tambang in gen uhi - Kaunei pasal khat in aneilou a zi pen a law pai hi. Ahin a nei numei khat in a neilou pasal  khat kiteenpi taleh ta pasal a nei masang un a pasal lawlou hi. Tualeh kauneite innsungsa i vanehleh ang law thei hi. Mekanna sathau, samhietna samsi, vanpuohna nam chite i kitanleh ang law thei hi.

8. Kau val
Kau val ahisihleh kaumat chi natna chimai ding khat um chin a zau thei mama uhi. Kau zong chingam va-ia lou in, kholai bawl a chi va-ia uhi. Tambang ngaidan nei uh ahiman in kau nei dan a kigen mite pen ningkhin in, kidah thaw in, a giin bawl uhi. Tambang a kau val chia miten a buoipi valuoi uh damlou thum bang ka tuoh khata hi. Damloupen kau val hileh hilou etchetnan damloupen theiloukal in suongkuo singte ahisihleh a singthem ahilouleh a pah themkhat vala in tua damlou tahsa toh kinukha in koidap in a umdan a en uhi. Damloupen ningkitel a ang um pialpuolleh kau val hina ahi chi uhi. Tuamabang in damloupen khu sasan zun dawnsah ua, a dawn ut louleh kauval hina chin pom uhi. Tambang a damloute khu khotheilou a um in a ut dandan un hamkhie ua, a thei ngailou uh ham-le-pau zong zang thei uhi. Ahal kal chieng un lah a du-le-ngaite uh ngen in tampipi ne zou zel uhi. Tambang a damloute khu 80% bang numei kum 14-45 kikal mi ahi nuom deu uhi.

9. Kau val zendan
Kau val hi chia a pomdet zou chieng un tambang in bawl uhi. Mi tampiten thakhat in damloupen pummat in tang theilou in tuden uhi. Thu a dong ua, “Koi na hei? Bang dei-bangngai a tamna hing haw kawi na hieima?” chin. Damloupen hing hamkhie in “Na inn ua kang hawleh na sa me uh nang hawm sih uhi” chibang ahisihleh paulap tuomtuom a gen hi. Tuachin “Kigen in koi na hieima? Na nu-le-pa koi e? Na kigenleh na dei leh ngaite hing pe ding hi ung” achi uhi. Tuachin ang
kigendoh hi. Tuachin a ngetpen pie in a nehzou chieng, “Tun peitaw” chin a zawl uhi. Damlou tuten a tuden uhi. Damlou hing ham in “Pei tang ei” ang chi hi. “Heisung na gei tai?” chin a dong ua, a tunna tantan a gen hi. “Inn tung tang e” achi chieng damlou tuten a hakhe pan uhi. Hichin ang damta achi uhi. Tua kau val damloute inn leh “Inn tung tang e” chia a umna dan a a gen mun ahisihleh khuo khu gamlapi ni 2 ni 3 peina a gamla ahi hi.

10. Kau kigenkhe utloute zen dan
Kau in mi a val chieng in val a umpen kau in a tha man tahleh a valtu kau khu a kigenkhe ut vawtsih chi uhi. Kigenkhe utloute khu tambang in zen uhi:- Thakhatthu in damlou khu lenpi (fishing net) in a tuom ua, tua zou chueng sasan kii toh damloupen dip sutuo in veihialei a valtu kau pen zong shi chi uhi. Tambang a a bawlte uh pen hing nalai dia gintatna a neitahlou uh, kau in a sungluo (possess) jieh a hing a ne-ledawn maimai a hita chi uhi. Tuachia lenpi a tuom in a hingtang in vui uh a, tuachin a valtu kau zong chipen mihing kauneitu pen zong shi chi uhi. Gendan tuom khat ah-tambang a kihingvui pen han i buhleh kauneitupen mihing mama a hing kilang in kithat thei chi uhi. Han i buhna ding mun pen ah eima hing sel thei din sipilang kithe a, tam sipilante khu pou in a bawh pha mama a, tuami kawm a a buhte ki-um ahiman in kau in hing mu theilou chi uhi. Tambang a han a kibuh chieng in kau pen ganhing tuomtuom in ang kilang masa a, a tawp in a valtu mihing pen ang kilang chi uhi. Tuatah chieng thau in kaplup thei ahi chi uhi. Tuaban ah kau in mi a val laitah in tua damlou pen sam (hair) i tansahleh a dam chieng in damloupen sam kitanlou in a valtupen sam ana kitan chi uhi. Kau in a val sung a a kivuohnate pen kau in a hakhiet zou chieng dam pai hieu chi uhi.

11. Ngaisut ding
Dawi in sielpi (mithun) hamsah thei kha ding hi. Mihing siemkhiet chilou sildang bawl theina dawi in nei hi. Siel khat ham thei in hammaw taven! neh dia kigou sielsa neh zieh in mihing in kau nei thei va na chi ei? Laisiengthou a dawi bawl kichite toh tekah in. Tuate pen dawi nei hilou in dawi in a suhgenthei zieh a mihing um dingdan a zong um thei taloute ahi zaw uhi. Mutheilou kau khu mihingten tutah den thei din na gingta eimah? Tu kawmkawm a thu donga, “Pei tang e, inn tungtang e” chi khu tahsan um nasanai? Kau valte kisawisahnate kau in a hakhiet chieng a dam vahiau chi thu ah ken ka tuohkhahte dam vahiau malah in kalni kal thum innkul bou ve uh aw! Samtan thu ah zong doh theiteng ka dong lele a, koiman tuami hun in tuabang a kauval khat sam kitansah in a valpen a maimai kitanna e, chia gen ngam koima ka mu sih hi. Genkhat vang a nei sam ua, “Tuabang a sam i tansah leh kau pen thangpai in a valpen a that teitei hi. Tuazieh a koiman kauvalte sam tan ngam ngailou hi.” chi ahi. Mutheilou kau lenpi hawmah pit theilou din na gingta eimah? Kau khu mihing in kitutah den thei va na chi eimah? Sitang i kimvela themai ziehin kau in hing mu theilou din na gingta ei? Kau khu dawi ahia, dawi khu hagau a hing ahia, huntawp ni chieng a gawtmun meidil a pai ding a Pasian in a koi ahi. Thau a kaplup thei ahi na diei? Ahisihleh i vuilum thei ding e?

12. Kauval pen i hingvuileh a neitupen shi
Ahinlah kauval i hingvuileh a neitupen shi chi thu ah gintat thei vang um hi. Kau in tua kau nei chia miten aminvaw ua a gin pen uh innkuon hah-le-suonte min tungtawn a a khangkhang a nasem ut ahiman a, kau pen kithat ahisihleh kiman thei ahi chi thugin (doctrine) mihingte lungtang a ana koidet ahita hi. Tambang a mihing a thuzawna ding in, kauvalpen a kihingvui chieng, kaupen in amin a suon mihing pen a tha hikha zaw ding hi. Tuachiin ama nasep-le-silbawl khu mihingten a tahsang den ding uhi.

13. Thukhumsin
I pulepaten khantanhoi (gospel) thupha ana mu masang un, setan in amaute thuzawna ding in a tung a i gen thuginte a lungtang uah na phutkip zouta hi. Tu ei khang ah bangchin i koita diei? Khantanhoi i muna kum tamtah phata hia maw! Unau Mizo lah ah tambang genkhah in um nawnlou hi. Gendan dang khat ah - Chiemnui bawlsiem ahisihleh mitphieldawi siem khat silbawlte miten en nuom mama ua, hun khat ah tua mipa silbawldante a kiip-a kawi in theikheta uleh, tuapa silbawlte etnop huoi a sa na ding uh e? Tuamabang in mitphieldawi bawlpan zong tuabang mite lah ah a silbawl sunzop ut nalai va na chi ei? A tung a kau kilawsawn thei dan i gente a dih hitaleh leitung ah kau neilou mihing um nalai va na chiei?

Search